بكالوريا و تاسع

من طرف GEORGE ALASMAR الإثنين 06 أكتوبر 2008, 7:11 pm

نتائج الامتحان
عندما يتبهدل الطالب و يُهان

بمجرد أن يخرج طلاب الشهادات من مرحلة الفحص وسماجته…يعتقدون أنهم سينتقلون لمرحلة أكثر هدوء و راحة..ولكن (لا يا حبيبي لا) فالأمر سيتطور والسماجة والتدقيق والتضييق سيتطور وسيحيط بأيامهم ولحظاتهم وحتى ما تبقى من أنفاسهم …والقصة تبدأ من هناك (ارجعولي بذاكرتكم فلاش باك لورا شوي )...من هديك اللحظة.

(فلاش باك)

عند أبواب المراكز الامتحانية التي يخرج منها طلاب وطالبات التاسع والبكالوريا تشهد (سوريا مهد الحضارة برعاية مدري مين) تجمع بشري كبير وهائل ...من الأهالي الذين يسارعون نحو أولادهم المفحوصين وبناتهم المفحوصات للاستفسار السريع عن (كيف طلعتو اليوم ) والطالب النكتي الكلاسيكي سيجيب بالنكتة المعهودة و المتصدأة (والله من الباب مو من الشباك يعني) مما يبرر الكف المخمس الذي سيتلقاه من والده....وطالب آخر قد يختار الكذب وسيلة نجاة..دون أن ينتبه إلى أدائه الضعيف الذي يكشفه على حقيقته مو لأنو حبل الكذب قصير ولكن لأنه ما لعبها صح فيجيب باستهتار مرفقاً جوابه بتنهد وحرقة قلب (أوووف منيح...ماشي الحال بنجح)..إي لا واضح منيح.

آخرون واخريات سيختاروا الجواب المختصر الكفيل بأن يوقف من حولهم كل الاستفسارات والتساؤلات ..(والله ضربونا..)...ولكن الأهل مازال لديهم الكثيير الكثيير من الأسئلة (بشو ضربوك..أو شلون ضربوك وربما كيف ضربوك ) وجميعها تصب في نفس المعنى ذاته الذي يعني(لو كنت دارس ولى ..ما حسيت بالضرب والخبط تبع التربية).

(زووم إن)

وبعد ما تعود جماهير سوريا التي شاهدناها (من شوي) بالمشهد السابق إلى بيوتها تبدأ نهارات وليالي جدية لا تحمل لجماعة الشهادات من تاسع و بكالوريا غير الرعب والنق والويلات..

وجميع من علم أن هنا في هذا البيت (فرد- أو فردة) عندهم شهادة ( تفالح وتفزلك) وقدم نصائحه بالمجان ( هلأ بلش الجد...يومين و بيبلش التصحيح...الله يستر، كلها شهر زمان وبيدوب التلج و بيبان المرج)...إضافة إلى الكثير من الإشاعات التي تزداد و تتبهر وتتجمل وتربى بعزهم ودلالهم ...(جار والد أحد الطلاب بالمحل : والله عم يقولوا سلم العلامات هالسنة مصعبينو كتير كتيير ..والله يستر)...و بنت خالتها لأم مرت عمها لوحدة من الطالبات سمعت أنو سمعتلك إنو ما في تساهل بالتصحيح بنوب بنوب هالمرة..ومابينفد إلا كل طويل عمر...طمنيها لبنتك!!)

حتى بياع تماري الكعك يلي بحارة بيت جد أحد الطلاب بيقول: ( والله قريت بالجريدة..أنو بدهم يرفعوا المعدلات كتير هالسنة ..الله لا يوفقهم يبدو ما بدهم غير الناس يلي كتير فهمانة..شو وضع حفيدك مالي أيدك من فهمه حجي!!)

(مونولوجات)

و يبقى الطلاب محاولين أن يعيشوا حياتهم على أمل أن يغيروا جو قبل صدور النتائج العجبة التي لا يستطيعون التوقع والتكهن بوضعها...على عكس أهاليهم الذين يبدون بمحاسبتهم حسب التوقعات!!! (شلون يعني ؟!!أي كمل قراءة بالأول )

- أم إحداهن: صرلنا 3 سنين مسكرين الباب بوش الخطابين كرمال دراستك، بس هلأ إذا ما جبتي علامات منيحة رح جوزك لأول واحد بيدق بابنا ومين ما كان يكون إنشالله بكون بياع الفلافل يلي بحارة بيت ستك( قرايب بياع التماااااري بكعك).

- والد أحد الطلاب (الغيرعصبي) : بعرضي إذا ما نجحت رح نزلك معي عالشغل متل الكلب، واسترجي قلي مابدي أو بدي عيدها ..يا...(تووووووووووووت رقابية).

- والد ووالدة أحد الطلاب إذا ما بتجيب طب أو هندسة ..لا تحلم نصرف عليك فرنك من هون ورايح ..أي لعفة طلعوا عيون بالطول والعرض معك ما أحلاك ما تجمع) والجدير بالذكر طبعاً أن النتائج لسه ما طلعت...ها.

(خدمات مجانية)

ومن باب لسنا الوحيدون لكننا الأفضل..يبدأ المتبرعون بالتوافد و التكافت على بيوت المفحوصين والمفحوصات أبو شهادة وأم شهادة.. مقدمين أفضل و أسرع العروض..

فابن بنت خالة والدة طالبة تاسع مثلاً يكلف نفسه باتصال هاتفي عند آخر الليل ليسأل بلهفة قادرة على زرع الرعب في قلوب الناس يلي ما إلها علاقة بالموضوع ...ويسأل بصوت مبحوح ومستعجل :

كتير الغلبة : ألو ..مرحبا..شو شو رقم المحروسة تبع الفحص ..شو هو ؟

أم الطالبة : خير طلعوا العلامات.

كتير الغلبة محاولاً تهدئة الأمر على أساس : لسه لسه لا تخافوا أنتوا بس عطوني ياه للرقم ..اتوكلوا على رب العالمين ..ورجعوا ناموا!!!! مافي شي مافي شي.

وبعد ما يطرد النوم من قلوب العيلة وليس فقط من عيونها ..تشحب طالبة التاسع ومع بزوغ الفجر تفقد الوعي لأنو (كتير الغلبة ) ما رجع اتصل ولأن السكوت علامة الرسوب برأيهم ..فيبدأ الجميع بالتعامل مع الطالبة المسكينة على هذا الأساس حتى يظهر بطلنا المغوار مرة ثانية باتصال آخر يؤكد أن النتائج لم تظهر بعد ..ولكن يبقى الشك ينهش قلووب العيلة التي تبدأ بالتفتيش عن النتيجة على النت وعلى حيطان التربية (النت وحيطان التربية ..!!! بتضحكوا هالكلمتين جنب بعض ..مو؟!)

(شرف وكرامة ونجاح)

وبصيروا هالطلاب وهالطالبات نهارهم نهار وليلهم نهار، وهنن عم يسمعوا الويل والثبور، والعقاب بعظائم الأمور، لدرجة إنو بيقتنعوا إنو حياتن ومصير العيلة وكرامتها وشرفها تحت الخطر إذا ما نجحوا لا سمح الله.

- أم إحدى الطالبات: الله ينجحك يارب وتفوتي جامعة جكارة ببيت عمك يلي قاهرين قلبي إنو ماجبت لأبوك صبي ..وياما حاولوا يجوزو.. الله لا يوفقهم بس الله كبير.... إنشالله بتفوت جامعة وبتصيري فهمانة ومتعلمة ليعرفوا إنك بتسوي عشرة من ولادهم الشباب يلي ما وصولو للعاشر.

- والد أحد الطلاب: الله يرضى عليكي بابا بدي تجيبي عامة ..لأنو بكرة بقولوا أبصر بشو كانت متلهية حتى ما جابتها عامة..وأنت بنت والبنت متل لوح القزاز أي شي بيعلم عليها.

(الناجح يرفع إيديه زكاتكن)

وأخيراً بتطلع النتائج عن حق وحقيق، وبيبلش موسم المشافي وبتشغل الكفوف والقشط وبتشتغل كمان الزغاريد والدموع، يعني جماعة الشهادات بتاكلها على الحالتين:

- ويلي نجح فوق المعدل بعلامة أو أكتر شوي (بيتبهدل أكتر من الراسب نفسه) وكل مين عرف بعلامته شارك مشاركة خاصة بتقليل قيمته وقدره هو وشهادته (الله يخزيك والله لو رسبت أحسن لك.. مو أحسن ما نقول نجح..لا حول ولا قوة إلا بالله)

- وبالمقابل الذي رسب على علامة (بيتبهدل و بتنمسح فيه الأراضي)..لعمة معقووووول ترسب على علامة شو مخك أنت شو مخك؟!

- ويلي نجح وما جاب المعدل المطلوب اجتماعياً بينحكم عليه يعيد ومن هنا كانت موضة (ناجح ويعيد).. والله بدك تعيدها لو جبت هندسة بدك تعيدها لتجيب صيدلة ..شو لمين بدك تترك صيدلة أبوك يعني؟

(منافسة)

ويبدأ مسلسل تنافس الأهل بين بعضهم البعض متضمناً حالة التبرير و التأكيد وغيرها من الحركات)

- أم واحد راسب: والله ما درس ولا فتح كتاب... وماكان بده يقدم فحص..هو معتبرها هالسنة مستمع..والسنة الجاي بدو ياخدها جد.

- والدة طالبة راسبة: مسكينة إجتها مغصة بقلب الفحص ما خلتها توعا منوب، ولولا هيك أقل من عامة ما بترضا، بس شو بدنا نعمل، هيك الله كاتب.

إضافة إلى شماتة المقربين والمنافسين :

- بعلمي الكتاب ما نقام من إيد المحروسة...؟ بس بدك الصحيح جارتنا، الشغلة بترجع للفهم والذكا.

- والله يا عديل أنا بنتي من يوم بظتها أمها تطلعت فيها هيك وقلت هي لاحة دكتورة وهيك صار...بس المحروس ابنك ع سلامته والله بس لاحتو صانع لا تواخزني مبين مو تبع شهادات.

(و أخيراً... )

بتمضى الأيام واللي رسب بلش يحضر للسنة التانية، واللي نجح ناطر ليشوف شو بدو يطلعلوا ، وبتطلع معدلات العام والفني للتاسع، والمفاضلة للبكالوريا، وهون بيرجعوا الأهل والمجتمع لياخدوا دور الصدارة ويحددوا مصير أبو شهادة وأم شهادة....متل ما بدن هنن....مومتل مابدهم الطلاب والطالبات :

- جايبة 210 وبدك تفوتي فنون جميلة ...إنتي شو صاير بمخك آآآ إذا ما بتسجلي هندسة مدنية

لا أنتي بنتي ولا أنا بعرفك.

- ما طلعلك عامة..ماهيك ..وشو ناطر تسجل تجارة و صناعة.....إي قوم نزيل معي عالمحل وتعلم صنعة أبوك أحسنلك..تضرب بهالراس شو سميك.

- ياخالتي الله يهديك ويسامحك أي شو بدك تطلع من المعهد الزراعي فلاح مثقف يعني.

- ميكانيك؟!!.. له يا ابن أخي ...آخرتك مكنسيان يعني.

- بتطلع عيونك بالطول والعرض مابسجلك فلسفة ناقصك إنتي فزلكة ناقصك !!

- يطلع بلعك طلعلك صناعة وبدو يطلع صوتك ..والله لطلع روحك ...والله.

Basketball

{<GeOrGeS Al AsMaR>} Basketball

[/size]